Høgtider og religiøse festar
Sikhane har ein tettpakka festkalender. Nokre av høgtidsdagane har felles opphav med hinduiske festdagar, medan andre er spesielle for sikhismen og er knytt til historia. Vaisakhi, Divali og Hola Mohalla er feiringar som var og er viktige for hinduane i Nord-India, og som sikhane har adoptert og gitt ei eiga tyding. For den norske diasporaen er det vanskeleg å følgje festkalenderen, sidan heilagdagane gjerne er vanlege arbeidsdagar i Noreg. Sikhane løyser dette ved å flytte feiringane til næraste helgedag. Til dømes blei Vaisakhi lagt til ein laurdag i 2007, ein dag etter den eigentlege heilagdagen.
Vaisakhi (eller Baisakhi) er nyttår for sikhar og hinduar, og blir feira den 13. april. Opphavleg var feiringa òg knytt til innhaustinga i midten av april. Ifølgje sikhismen grunnla Guru Gobind Singh khalsaen på denne dagen. Vaisakhi er derfor dagen for signing i khalsaen og dagen då flagget i gurduaraen blir bytta ut. I Oslo feirar ein blant anna med ein prosesjon gjennom sentrum.
Kvart år feirar sikhane i Oslo Vaisakhi med ein prosesjon langs Karl Johans gate. Først i prosesjonen går fem staselege krigarar. Denne viser til Panj Pyare, Dei fem avhaldne, som var dei første som vart tekne opp i khalsaen av Guru Gobind Singh. Foto: Anders Bettum, Oslo museum, Interkulturelt museum.
Divali blir feira i oktober/november, og er for sikhane ei påminning om at Guru Hargobind på denne dagen blei slept fri frå fengslinga hos moghulkeisaren. Det var òg på denne dagen Guru Ram Das la grunnsteinen for Harieindir Sahib, den vakre gurduaraen i Armitsar. Mange reiser derfor på pilegrimsferd til Armitsar på denne tida, og feirar divali der.
Hola mohalla er svaret til sikhane på holifesten til hinduane, og blir feira i mars. Guru Gobind Singh starta denne festivalen i 1700 for at sikhane skulle ha ein dag for militær trening. I praksis blir til dømes dagen i Oslo feira med eit storstilt sportsarrangement, der gamle og unge deltek med stor entusiasme. Alle som vinn får utdelt flotte premiar.
Ein type feiring som ingen andre enn sikhane feirar er gurpurab, årsdagane for fødsel og død for guruane. Tre av desse tjue dagane blir feira av alle sikhar kvart år, fødselsdagen til Guru Nanak i november, fødselsdagen til Guru Gobind Singh i januar/februar og martyriet til Guru Arjan i mai/juni. Sentralt i feiringa av gurpurab står ritualet akhand path, der Adi Granth blir lest opp utan pause frå start til slutt over 48 timar.